Adroddiad Rob Griffiths o'r Daily Post.

Cadwodd PWLLHELI eu record cant y cant yn Adran 5 o'r Gynghrair ar draul Wrecsam i symud i frig y tabl. Ffordd Bryn Estyn oedd lleoliad gêm fawr y diwrnod ac yn wir y tymor hyd yma gyda’r ddau dîm yn chware i amddiffyn eu record di-golli. Llwyddodd Pwllheli i guro a sicrhau pwynt bonws gyda sgôr o 29-0 i symud pwynt ar y blaen o’u gwrthwynebwyr.

Roedd hyfforddwr Wrecsam, Russell Penrhyn-Jones yn hollol onest yn ei ddadansoddiad i’w dîm gael eu haeddiant. “ Pwllheli oedd y tîm gorau, roeddynt lawer mwy clinigol ac yn meddu ar fwy o opsiynau na ni. Mae gêm Wrecsam yn gyfyngedig i chwarae un ffordd yn unig - a hynny yw ceisio ennill gemau drwy nerth a chryfder y pac. Dwi’n trio fy ngorau i gael yr hogia i agor y gêm allan.” meddai.

“Mae timau megis Pwllheli a Bethesda gyda rhywbeth ychwanegol i’w gynnig, mwy o opsiynau a’r gallu i agor y gêm allan ac wedyn cadw pethau’n dyn fel bo angen. Tydi’r gallu i gystadlu gyda thimau fel hyn ddim ganddo ni. Mae’n rhaid i ni ddechrau cynhyrchu chwaraewyr sy’n gyfforddus yn trafod y bêl. Chwarae teg i Bwllheli roedden nhw’n wych heddiw a dwi’n sicr y cawn nhw ddyrchafiad i Adran 4 a dal eu tir y tymor nesa. Mae’r gêm wedi rhoi pethau mewn cyd-destun cyn belled ag yr ydym ni yn y cwestiwn.”

Roedd Pwllheli ar ben eu digon i ddod gartref gyda buddugoliaeth ond roedd hyfforddwr y blaenwyr, Arthur Williams yn bendant na does dim wedi’i gyflawni eto.

Pwllheli were delighted to come away from one of their main rivals with a victory, but forwards coach Arthur Williams was adamant his side had done nothing yet. “ Mi ddaethom i Wrecsam heddiw yn chwilio am fuddugoliaeth ac rydan ni’n falch iawn o fynd yn ôl adra gyda phwynt bonws yn ogystal. Mae 'na 11 gêm ar ôl i’w chwarae ac mi fydd rhaid i ni barhau i ganolbwyntio os am gyrraedd y nod. Mae yna dimau da iawn yn yr Adran hon ac mae’r anodd cael unrhyw fath o ddilyniant fel y mae’r gemau wedi’u rhaglennu. Mae yna lawer o ffordd i fynd cyn ennill y Gynghrair.” 

Roedd Penryn-Jones yn agos iawn i’r marc yn ei ddadansoddiad o’r gêm. Cafodd Wrecsam cyfleoedd di-ri i groesi llinell Pwllheli ond methwyd a chymryd mantais o’r oruchafiaeth oedd ganddyn nhw yn y pac.

Wrecsam gafodd y gorau o’r meddiant - a hynny o dipyn go lew - ond methwyd a dad-gloi amddiffyn cadarn Pwllheli. Methwyd a chanfod y llinell gais yn yr ail hanner hyd yn oed pan oedd Pwllheli’n brin o Chris Studt anfonwyd i’r gell cosb am gam-sefyll cyson. Ac i daflu halen ar y briw sgoriodd Pwllheli ddau gais hwyr yn y gêm i sicrhau’r pwynt bonws.

Roedd hi’n ddiwrnod diflas iawn i’r tîm cartref bron o’r cychwyn wrth i’r maswr Richard Lloyd fethu cic am y pyst ar ôl 11 munud. O fewn 10 munud roedd Pwllheli wedi agor y sgorio wrth i ffug bas y cefnwr, David Ll Williams dorri’r amddiffyn a’i alluogi i sgorio rhwng y pyst.

Daliodd Wrecsam i ymosod yn yr un modd ond heb lwyddiant. Yn dilyn hanner amser a gyda’r gwynt ar eu cefnau Pwllheli gymrodd fantais i fynd ymhellach ar y blaen a gwneud y gêm yn saff. Sgoriodd y maswr, Elgan Rowlands gic cosb cyn i Meilir Hughes sgorio’r cais tyngedfennol i dorri i ffwrdd o sgarmes a rhedeg drwodd yn ddiwrthwynebiad.  

Gyda Wrecsam yn prysur anobeithio daeth camgymeriadau i mewn i’w gêm a gydag amser bron ar ben aeth y bachwr, Dafydd Myrddin drosodd am drydedd cais y tîm, cyn i David Ll Williams sgorio cais orau’r gêm wrth redeg 80 medr i selio’r pwynt bonws a’r trosiad.

Cynlluniwyd gan: Keith Parry Hawlfraint 2006